AlbanianEnglish

Gati 100 të vdekur nga përmbytjet në Afganistan

Përmbytjet kanë vrarë të paktën 95 njerëz, kanë plagosur qindra të tjerë dhe kanë rrënuar mijëra shtëpi në Afganistan, thanë të martën autoritetet në vendin e goditur nga kriza.

Vdekjet ndodhën në 10 provinca gjatë 10 ditëve të fundit, teksa vendi po kalon nga një krizë ekonomike dhe humanitare e përkeqësuar nga sanksionet perëndimore të vendosura pasi talebanët u kthyen në pushtet vitin e kaluar.

Zëvendësministri i Menaxhimit të Fatkeqësive Mawlawi Sharafuddin Muslim tha se ndihma e urgjencës ushqimore ishte dërguar në shumë zona të prekura nga përmbytjet dhe organizatat e ndihmës kishin premtuar të ofrojnë ndihmë emergjente, por kjo mund të mos jetë e mjaftueshme.

“Dimri po vjen së shpejti dhe këto familje të prekura që përfshijnë gra dhe fëmijë nuk kanë strehim për të jetuar. Të gjitha fermat e tyre bujqësore dhe pemishtet ose janë shkatërruar plotësisht ose të korrat e tyre janë dëmtuar,” tha Muslim.

“Nëse këta njerëz nuk ndihmohen për t’u rikthyer në normalitet, situata e tyre patjetër do të përkeqësohet në javët dhe muajt e ardhshëm.”

Afganistani është goditur kohët e fundit nga një sërë fatkeqësish natyrore dhe ngjarje ekstreme të motit, duke përfshirë një tërmet në qershor që vrau më shumë se 1000 njerëz.

Muslim u bëri thirrje organizatave të ndihmës, Kombeve të Bashkuara dhe komunitetit global që të ndihmojnë afganët e prekur nga përmbytjet jo vetëm me ndihmë urgjente si ushqim, strehim dhe ilaçe, por edhe për të ndihmuar në një afat më të gjatë pasi shumë njerëz kanë humbur shtëpitë, jetesën dhe burimet e ujit.

 

*TiboNews

You don't have permission to register