Zjarri ka pushtuar tre zona kroate, një në qarkun Zadar dhe dy në qarkun Shibenik-Knin, të mërkurën dhe rreth 20 shtëpi u dogjën në qarkun Shibenik-Knin ku zjarri ishte më i keqi, por pa viktima.

“Përafërsisht 20 shtëpi janë djegur,” tha Darko Dukiç, komandanti i Brigadës së Zjarrfikësve të Qarkut Shibenik-Knin.

“Shumë vendas janë evakuuar dhe 150 zjarrfikës po shuajnë zjarrin në vendngjarje dhe tre helikopterë po ofrojnë mbështetje ajrore”, tha Dukiç.

Ndërkohë, Ministria e Mbrojtjes njoftoi të mërkurën se po dërgon 52 ushtarë në qarkun Shibenik-Knin për të ndihmuar në shuarjen e zjarrit.