Studiuesit kanë zbuluar një zemër 380 milionë vjeçare brenda një peshku prehistorik të fosilizuar.

Ata thonë se ekzemplari tregon një moment kyç në evolucionin e organit të pompimit të gjakut që gjendet në të gjitha kafshët me kocka kurrizore, përfshirë njerëzit.

Zemra i përkiste një peshku të njohur si Gogo, i cili tashmë është zhdukur si specie.

Zbulimi është publikuar në revistën Science në Australinë Perëndimore.

Shkencëtarja kryesore, Kate Trinajstic nga Universiteti Curtin në Perth ka treguar momentin e zbulimit:

“Ne ishim mbledhur para kompjuterit dhe e kuptuam se kishim një zemër, në fillim nuk e besuam. Ishte tepër emocionuese”.

Zakonisht, janë kockat dhe jo indet e buta ato që kthehen në fosile, por në Kimberley, i njohur si formacioni shkëmbor Gogo, mineralet kanë ruajtur shumë nga organet e brendshme të peshkut, duke përfshirë mëlçinë, stomakun, zorrët dhe zemrën.

“Ky është një moment vendimtar në evolucionin tonë,” thotë shkencëtarja Trinajstic duke shtuar: “Ne kemi evoluar shumë herët dhe ne e dëshmojmë këtë për herë të parë në këto fosile.”

Bashkëpunëtori i saj, shkenëtari John Long nga Universiteti Flinders në Adelaide, e përshkroi zbulimin si ” befasues dhe mbresëlënës”.

“Ne kurrë nuk kemi ditur asgjë për organet e buta të kafshëve kaq të vjetra, deri më tani”.

Peshku Gogo është i pari i një klase të peshqve parahistorikë të quajtur plakodermë. Këta ishin peshqit e parë që kishin nofulla dhe dhëmbë. Para tyre, peshqit nuk ishin më të mëdhenj se 30 cm, por plakodermat mund të rriteshin deri në 9 m në gjatësi.

Plakodermat ishin forma mbizotëruese e jetës së planetit për 60 milionë vjet, duke ekzistuar më shumë se 100 milionë vjet përpara se dinosaurët e parë të ecnin në Tokë.

Skanimet e fosilit të peshkut Gogo treguan se zemra e tij ishte më komplekse sesa pritej për këta peshq primitivë. Ajo kishte dy dhoma njëra mbi tjetrën, të ngjashme në strukturë me zemrën e njeriut.

Studiuesit sugjerojnë se kjo e bëri zemrën e kafshës më efikase dhe ishte hapi kritik që e transformoi atë nga një peshk që lëviz ngadalë në një grabitqar që lëviz shpejt.

*Tibo News