AlbanianEnglish

Uragani Ian, stuhia më e keq e viteve të fundit ‘gjunjëzon’ Floridan

Një nga stuhitë më të rrezikshme që ka goditur SHBA-në në vite ka lënë miliona banorë në Florida pa energji elektrike dhe ujërat e përmbytjeve janë rritur në vend.

Uragani Ian arriti në tokë rreth orës 15:10 me orën lokale (20:10 GMT) të mërkurën, duke u përplasur në bregdet me shpejtësi të erës prej 241 km/h.

Skenat dramatike panë një çati spitali të hedhur në erë, makina të zhytura në ujë dhe pemë të shkulura nga toka.

Ian tani është reduktuar nga një stuhi e kategorisë së katërt në një stuhi të kategorisë së parë.

Megjithatë, vendasit janë paralajmëruar se 24 orët më të rrezikshme janë përpara dhe kryebashkiaku Jane Castor u ka kërkuar njerëzve të strehohen në vend gjatë natës deri në mëngjesin e së enjtes.

“Ne do të përjetojmë shumicën e shiut dhe erërat e forta duke filluar rreth orës 20:00 dhe ato do të zgjasin gjatë gjithë natës,” tha Jane Castor gjatë një konference në mbrëmje të së mërkurës.

Në kontenë Lee, rajoni jugperëndimor ku Ian arriti, policia u pengua të përgjigjet ndaj raportimeve për plaçkitje në një pikë karburanti për shkak të dëmtimit të stuhisë.

Si rezultat, është shpallur shtetrrethimi “deri në një njoftim të dytë”.

Menaxheri i qarkut Lee Roger Desjarlais tha se komuniteti i Fort Myers “ka qenë deri në një farë mase i shkatërruar”. Disa lagje në qytetin me 80,000 banorë ishin kthyer në liqene.

Guvernatori i shtetit Ron DeSantis e përshkroi uraganin Ian si “ngjarjen më të madhe të përmbytjes” që ka parë ndonjëherë Florida jugperëndimore dhe njoftoi se 7,000 trupa të Gardës Kombëtare janë gati për të udhëhequr operacionet e shpëtimit në zonat e përmbytjeve.

Presidenti Joe Biden do të marrë një konferencë të enjten nga Agjencia Federale e Menaxhimit të Emergjencave.

Uragani Ian tani po vazhdon të lëvizë drejt veriut përmes Floridës. Aeroporti Ndërkombëtar i Jacksonville, me qendër në Florida verilindore, anuloi të gjitha fluturimet e planifikuara për të enjten.

Qendra Kombëtare e Uraganeve (NHC) tha se Ian po ecën me rreth tetë milje në orë dhe parashikohet të dalë në Atlantik deri të enjten në mëngjes.

Pritet të arrijë në Georgia dhe Karolinën e Jugut të Premten.

Virginia i është bashkuar gjithashtu Georgias, Karolinës së Veriut, Karolinës së Jugut dhe Floridës duke shpallur gjendjen e jashtëzakonshme.

Bregdeti perëndimor i Kubës u godit nga uragani Ian të martën. Energjia tani është rivendosur në disa zona pasi ishulli u zhyt në një ndërprerje totale.

Dy persona mësohet se janë vrarë në Kubë dhe më shumë se 20 emigrantë kubanë besohet se janë zhdukur në det.

 

*TiboNews

You don't have permission to register