AlbanianEnglish

Trump nuk ka paguar taksat përgjatë vitit të fundit si president

Donald Trump nuk pagoi taksa mbi të ardhurat gjatë vitit të fundit të mandatit të tij presidencial.

Një raport i publikuar nga Kongresi tregoi se Trump shmangu taksat duke deklaruar humbje nga bizneset e tij.

Me nismë të demokratëve Kongresi ka nxjerrë në pah faktin se gjatë mandatit si President, të ardhurat dhe detyrimet tatimore të Trump pësuan luhatje domethënëse dhe në vitin e fundit fatura ishte zero.

Të dhënat thyejnë imazhin e kultivuar prej kohësh të ish-presidentit republikan si një biznesmen i suksesshëm, ndërsa ky ka bërë me dije synimin për të kandiduar sërish.

Dokumentet tregojnë se gjatë katër viteve në Shtëpinë e Bardhë, Trump dhe gruaja e tij, Melania, përfituan kompensime dhe minimizuan detyrimet tatimore falë deklarimeve me humbje të bizneseve të tyre.

Në katër vite ata paguan vetëm 3 milionë dollarë në total dhe në vitin 2020 nuk paguan asgjë falë përllogaritjeve në humbje të deklaratave.

Demokratët kanë vënë në diskutim legjitimitetin e disa prej këtyre praktikave.

Trump refuzoi t’i bënte publike deklaratat e tij tatimore gjatë dy fushatave zgjedhore edhe pse të gjithë kandidatët e tjerë presidencialë e kanë bërë këtë gjë për dekada me radhë.

Kongresi i mori të dhënat tatimore të Trumpit pas një lufte të gjatë ligjore dhe, kryesisht me votat e demokratëve, vendosi t’i bëjë ato publike.

Demokratët thanë se rishikimi i deklaratave tatimore zbuloi se autoritetet nuk i kishin shqyrtuar siç duhet për të siguruar saktësitë e tyre.

Kjo ndodhi kryesisht për faktin se ndaj Trump ishte caktuar vetëm një agjent auditimi.

Një zëdhënës i Trump tha se publikimi i deklaratave tatimore ishte i motivuar politikisht.

*TiboNews

You don't have permission to register