Trump mohon sërish akuzat për përdhunim: Jam i pafajshëm

Dëshmia e ish-presidentit Donald Trump në gjyqin kundër tij për shpifje ndaj autores E. Jean Carroll përfundoi pothuajse menjëherë pasi  Trump përsëriti qëndrimin e tij se pretendimi i zonjës Carroll se ai e kishte përdhunuar atë ishte një sajesë.

I pyetur nga avokatja e tij Alina Habba në gjykatën e Manhatan nëse i qëndronte dëshmisë së tij të tetorit 2022 në çështjen e Carroll, ai u përgjigj: “100% po”.

Më herët të enjten, avokatët e Carroll shfaqën video nga dëshmitë e Trump ku ai e quante atë “të sëmurë mendore” dhe e kërcënonte se do ta padiste.

“Është një akuzë e rreme, nuk ka ndodhur kurrë, nuk ka se si të ndodhte”, shprehej Trump.

Carroll, 80 vjeç, po kërkon të paktën 10 milionë dollarë dëmshpërblim lidhur me deklaratat e ish-presidentit Trump në qershor 2019, ku ai mohonte se e kishte përdhunuar atë në mes të viteve 1990 në dhomat e provave të një dyqani veshjesh në Manhatan.

Trump e ka akuzuar autoren Carroll se e kishte bërë akuzën për të shtuar vëmendjen për shitjen e biografisë së saj. Majin e kaluar, një tjetër juri e urdhëroi Trump t’i paguante Carroll 5 milionë dollarë.

Ai ka apeluar kundër këtij urdhëri.