Tajvani: Miratimi i shitjes së armëve amerikane tregon angazhim për t’u mbrojtur nga Kina

Ditën e sotme Tajvani falënderoi Shtetet e Bashkuara për miratimin e shitjes së pajisjeve dhe pjesëve për avionët luftarakë F-16, duke thënë se kjo do të ndihmonte ishullin të mbrohej kundër Kinës.

Kina pretendon Tajvanin si pjesë të territorit të saj dhe muajin e kaluar nisi stërvitjet rreth ishullit të vetëqeverisur disa ditë pas inaugurimit të presidentit të ri Lai Ching-te.

Shtetet e Bashkuara, një partner i ngushtë i Taipeit, miratuan të mërkurën dy shitje ushtarake në Tajvan me vlerë rreth 300 milionë dollarë në total, kryesisht pjesë rezervë dhe riparimi për avionët luftarakë F-16 të ishullit.

Ministria e mbrojtjes e Tajvanit shprehu të enjten mirënjohjen për miratimin e shitjes së armëve, e cila pritet të hyjë në fuqi brenda një muaji.

Ministria tha se shitja do të ndihmonte Tajvanin “të përmbushë nevojat e operacioneve të mbrojtjes” dhe shtoi: “Kërcënimi ushtarak nuk do të kontribuojë në paqen rajonale dhe ne i bëjmë thirrje Partisë Komuniste Kineze të ndalojë të gjitha llojet e sjelljeve irracionale kundër Tajvanit”.