13 persona janë vrarë dhe 21 të plagosur, pas një sulmi me armë në një shkollë në Rusinë Qendrore.

Mediat tregojnë se viktimat përfshijnë 7 fëmijë nga shkolla me 1000 nxënës në qytetin e Izhevsk, gjithashtu, dy roje sigurie, dy mësues e dy persona të rritur që ndodheshin pranë shkollës.

Deri më tani mësohet se autori i armatosur, pas krimit të sotëm i ka dhënë fund edhe jetës së tij për motive të paqarta.

Mediat ruse kanë postuar video të cilat tregojnë panikun brenda ndërtesës ku ndodhën të shtënat.

Dyshohet se sulmuesi ende i paidentifikuar ka qenë i armatosur me dy pistoleta. Ai është filmuar i shtrirë në tokë, i pajetë, veshur me një bluzë me simbolin nazist dhe një kapuç në kokë.

Shkolla ndodhet në qendër të Izhevsk, një qytet me rreth 650,000 banorë, afër ndërtesave të qeverisë qendrore.

Kreu i qarkut ka shpallur periudhë zie deri më 29 shtator.

*Tibo News