Ukraina dhe Rusia do të nënshkruajnë së shpejti një marrëveshje për të lejuar eksportet e drithërave përmes Detit të Zi, siç njoftoi presidenca e Turqisë të enjten dhe Gazprom rifilloi furnizimin me gaz në Evropë përmes tubacionit Nord Stream 1.

Sekretari i Përgjithshëm i OKB-së, Antonio Guterres do të shoqërojë presidentin turk, Rexhep Tajip Erdogan dhe përfaqësuesit e Ukrainës dhe Rusisë në ceremoninë e nënshkrimit të marrëveshjes të premten në orën 13:30 GMT në Stamboll, tha presidenca turke.

Shtetet e Bashkuara mirëpritën marrëveshjen e negociuar me ndërmjetësimin e Turqisë dhe ngarkuan Rusinë me përgjegjësinë për përmbushjen e paktit.

“Ne e mirëpresim shpalljen e kësaj marrëveshjeje, por ajo në të cilën jemi fokusuar tani është mbajtja e Rusisë përgjegjëse për zbatimin e kësaj marrëveshjeje”, u tha gazetarëve zëdhënësi i Departamentit të Shtetit Ned Price.

Marrëveshja e parë e arritur midis Ukrainës dhe Rusisë që nga fillimi i luftës më 24 shkurt, vjen në një kohë kur çmimet e ushqimeve po shpërthejnë në shkallë globale, gjë që kërcënon vendet më të varfra me zi buke.

Rreth 25 milionë tonë grurë dhe ushqime të tjera janë bllokuar në portet e Ukrainës nga luftanijet ruse dhe minat që Ukraina vendosi për të parandaluar një sulm me ujë.

Ministri i Jashtëm i Turqisë ishte shprehur “optimist” për një marrëveshje në “ditët e ardhshme”, nëse vendet perëndimore do t’i përgjigjeshin kërkesave të Rusisë.

Presidenti rus Vladimir Putin vendosi një kusht shtesë këtë javë duke kërkuar që drithërat e vendit të tij të përfshihen në negociata.