Një ngjarje e pazakontë ka ndodhur në një qendër votimi në Krujë. Ka të bëjë me një qytetar 44 vjeç i cili është paraqitur në qendrën e votimit numër 1285/2, KZAZ Nr. 20 ku ka marrë dy fletë votimi. Pasi ka marrë fletët e votimit, ai ka dalë nga qendra e hedhjes së votës dhe më pas i ka hedhur në një kosh mbeturinash. Pas këtij veprimi, ai është arrestuar. Policia ka njoftuar për mediat se akuza ndaj ti është ‘Dëmtimi me dashje i materialit zgjedhor’.

Njoftimi i policisë si më poshtë:

Rreth orës 13:50, Komisioni i Qendrës së Votimit 1285/2, KZAZ Nr. 20, Krujë, ka kërkuar ndihmë nga Policia e Shtetit, pasi shtetasi B. T. kishte marrë 2 fletë votimi nga Qendra e Votimit dhe ishte larguar.
Shërbimet e Policisë kanë organizuar menjëherë punën dhe si rezultat kanë kapur dhe shoqëruar në Komisariat, shtetasin B. T., i cili pasi ka marrë me vete 2 fletët e votimit (të veten dhe të nënës), ka dalë nga Qendra e Votimit, i ka dëmtuar fletët e votimit dhe i ka hedhur ato në koshin e mbeturinave.
Në përfundim të veprimeve të kryera në drejtimin e Prokurorisë, shtetasi B. T., 44 vjeç, banues në Tapizë, është arrestuar në flagrancë, për veprën penale “Dëmtimi me dashje i materialit zgjedhor”. Policia ka sekuestruar 2 fletët e votimit që ky shtetas mori nga Qendra e Votimit. Në drejtimin e Prokurorisë po vijojnë veprimet hetimore për zbardhjen e plotë të rrethanave të këtij rasti.