Vladimir Putin i ka krahasuar veprimet e tij në Ukrainë me pushtimin e bregut të Baltikut nga cari rus Pjetri i Madh gjatë luftës së shekullit të 18-të kundër Suedisë.

Pasi kujtoi ditëlindjen e 350-të të Pjetrit të Madh të enjten me një vizitë në një muze, Putini i tha një grupi sipërmarrësish të rinj në Shën Petersburg, “Keni krijuar përshtypjen se duke luftuar Suedinë ai po rrëmbente diçka. Por nuk po rrëmbente asgjë, ai po e merrte mbrapsht atë që i takonte”.

Në komentet që u transmetuan më vonë në televizion, Putin e krahasoi ofensivën e tij në Ukrainë me fushatën e Pjetrit të Madh për të zgjeruar Perandorinë Ruse.
“Me sa duket, na ra edhe neve që të kthejmë [atë që është e Rusisë] dhe të forcojmë vendin”, tha udhëheqësi rus duke shtuar: “Nëse ecim nga fakti se këto vlera bazë përbëjnë bazën e ekzistencës sonë, sigurisht që do të kemi sukses në zgjidhjen e detyrave me të cilat përballemi”.

Sipas zëdhënësit të Kremlinit, Dmitry Peskov, Putin vlerëson shumë rolin që ka luajtur cari në historinë ruse. Putin gjithashtu vuri në dukje se kur Pjetri i Madh themeloi Shën Petersburgun “asnjë nga vendet në Evropë nuk e njohu këtë territor si pjesë e Rusisë”.

Qyteti, i dyti më i madhi i Rusisë, u krijua në vitin 1703. Ai mbeti kryeqyteti i Perandorisë Ruse për më shumë se dyqind vjet deri në revolucionin rus të vitit 1917. Lufta e Madhe Veriore ishte një konflikt midis perandorive ruse dhe suedeze midis viteve 1700 – 1721.

Në koalicion me Danimarkën, Norvegjinë dhe Lituaninë, Cari sfidoi me sukses dominimin e Suedisë në Evropën veriore, qendrore dhe lindore. Duke mposhtur Suedinë në Luftën e Madhe Veriore (1700-1721), Pjetri i Madh e bëri Rusinë një fuqi kryesore rajonale dhe një lojtar të rëndësishëm në çështjet evropiane.

Ai ishte gjithashtu një lider modernizues, me pamje nga Evropa, i cili mori frymëzim nga perëndimi për të zhvilluar ushtrinë, shtetin, kishën dhe shoqërinë ruse. Ai ishte i bindur për nevojën për t’u reformuar pas një udhëtimi në Evropë, gjë që e bëri të vetëdijshëm për zhvillimin e kufizuar të perandorisë së tij.

Zhvendosja e Pjetrit të Madh drejt Evropës ka ende një trashëgimi të rëndësishme në Rusi sot.

Megjithatë, mes armiqësisë së shtuar midis Perëndimit dhe Rusisë për pushtimin e Ukrainës, Moska e ka minimizuar afinitetin e Pjetrit me Evropën dhe është fokusuar në ekspansionizmin e tij territorial.
Ai mbretëroi fillimisht si car dhe më pas si perandor nga viti 1682 deri në vdekje, në vitin 1725.

*Tibo News