AlbanianEnglish

Pronari rus i hotelit në Serbi mirëpret refugjatët ukrainas

Mikhail Golubtsov, një pronar rus i një hoteli në Serbi tha në një intervistë se ndjente paksa turp që e kishte bërë hotelin si ‘shtëpi mikëpritjeje’ për refugjatët ukrainas që i largoheshin sulmeve ruse në vendin e tyre.

“Në fillim isha në shok dhe më vinte shumë turp. Për disa kohë nuk fola rusisht, por kur erdhën të ftuarit dhe më folën rusisht, fola edhe unë. Mendoj se e vetmja gjë që mund të bëj tani është për të ndihmuar disi ukrainasit”.

Shumë familje ukrainase janë copëtuar, me shumicën e burrave të moshës 18 deri në 60 vjeç të ndaluar të largohen nga Ukraina pasi mund të thirren për të luftuar në një luftë që nga fillimi i saj një muaj më parë, që ka vrarë mijëra civilë.

Mësuesja ukrainase e anglishtes dhe nëna e tre fëmijëve Olga Manmar është një nga 34 refugjatët e deritanishëm që kanë gjetur strehë të sigurt në hotel, pasi kanë hyrë në Serbi nëpërmjet Rumanisë.

“Unë nuk e di se si funksionon kjo magji. Ti kalon kufirin, e di, është i njëjti planet, por duke kaluar kufirin ndihesh i sigurt. Është një ndjenjë e çmendur, e di. Është, e dini, i njëjti ajër, i njëjti terren, shikon përreth, por kalon kufirin dhe ndihesh i sigurt, por të vjen shumë keq për ata që nuk e kanë kaluar kufirin, ishte shumë e dhimbshme. Burrat nuk mund ta kalojnë kufirin … kështu që ata do të vozisin dhe pastaj…”

Manmar udhëtoi me shoqen e saj Anna Nizhegorodova, një ruse e martuar me një ukrainas që kishte jetuar në Kiev për 15 vitet e fundit. Nizhegorodova, dy fëmijët e së cilës janë gjithashtu me të, tha se nuk ndjeu asgjë kur mbërriti.

“Në mendjen tuaj, ju e kuptoni se gjithçka rreth jush është shumë e bukur dhe shumë e qetë. Por ju nuk e ndjeni bukurinë, asgjë. Ju thjesht dëshironi të mbuloheni me një batanije për ca kohë. Mendoj se të gjithë e kemi ndjerë këtë sepse fëmijët e mi ishin kështu, ata u shtrinë, u mbështollën me batanije, shikuan telefonat e tyre dhe nuk donin të shkonin askund.”

Kombet e Bashkuara thonë se 3.8 milionë ukrainas kanë ikur që nga fillimi i luftës, shumica e tyre në Poloni dhe Rumani. Vetëm rreth 2 500 kanë ardhur në Serbi deri më tani, pjesa e madhe janë thjeshtë kalimtar në rrugëtimin e tyre për në Evropën Perëndimore.

Pronari i hotelit Golubtsov, i cili u largua nga Rusia në vitin 2014 për atë që ai e quajti aneksimin “të papranueshëm” të Krimesë nga Moska, thotë se refugjatët ukrainas mund të qëndrojnë në vendin e tij të qetë për aq kohë sa u nevojitet, pa pagesë.

You don't have permission to register