Të 40-at mund të jenë një nga periudhat më delikate, për të vendosur zakone të shëndetshme për vitet në vijim. Dhe fatkeqësisht shumë njerëz të kësaj grupmoshe e kanë disi të vështirë kur vjen fjala tek stërvitja. Nëse jeni pjesë e këtij grupi, mos u dekurajoni. Një raport i Shëndetit në Australi ka treguar se 45% e australianëve nuk po bëjnë mjaftueshëm aktivitet fizik dhe nga grupmosha 45-55 vjeç, 56% nuk përmbushin udhëzimet aktuale të ushtrimeve.

Ndërsa kalojmë në moshën e mesme, dendësia e kockave dhe masa e muskujve fillon të bjerë, ashtu si edhe metabolizmi juaj. Ju mund të duhet ta shtyni atë pak më shumë, ose të stërviteni në një mënyrë tjetër, për të marrë të njëjtat rezultate si kur ishit më të rinj.

Shëndeti i përgjithshëm gjithashtu mund të fillojë të lëkundet. Të 40-at tona janë një fazë e jetës kur shumë prej nesh fillojnë të përjetojnë fillimin e sëmundjeve kronike. Lajmi i mirë është se stërvitja mund të ndikojë pozitivisht në të gjitha aspektet.

Aktiviteti fizik ul rrezikun e shumë prej këtyre sëmundjeve, duke përfshirë sëmundjen koronare të zemrës, diabetin e tipit 2, kancerin e gjirit dhe zorrës së trashë dhe shëndetin e dobët mendor. Ai gjithashtu ruan/përmirëson presionin e gjakut dhe kolesterolin, ndihmon në ruajtjen e peshës trupore dhe të muskujve dhe kockave të shëndetshme, përmirëson funksionimin njohës dhe zgjat jetëgjatësinë.

Ndërsa një dietë e shëndetshme është e rëndësishme, ajo nuk është e mjaftueshme për të shmangur ndikimet negative shëndetësore të një stili jetese të ulur.

Gjëja më e mirë e aktivitetit fizik është se çdo gjë që përfshihet në aktivitet fizik, apo çdo ushtrim ndihmon.

Pra, nuk ka rëndësi nëse nuk keni ushtruar kurrë më parë, filloni tani dhe merrni përfitimet afatgjata.

Të rriturit në të 40-at e tyre (në fakt të gjithë të moshës 18-64 vjeç) duhet të synojnë të jenë fizikisht aktivë për 2,5 deri në 5 orë në javë, me një intensitet të moderuar; ose gjysma për aktivitet me intensitet të fortë.

10 minuta aktivitet me intensitet të fuqishëm janë të barabarta me 20 minuta aktivitet me intensitet të moderuar, kështu që për ata që janë të varfër me kohën, të provojnë vrapime ose të praktikojnë notin e moderuar.

Ecja me intensitet të moderuar është një aktivitet i mrekullueshëm që mund të bëhet pothuajse kudo dhe kërkon shumë pak aftësi, kosto ose pajisje.

Rekomandohet gjithashtu që të përfshini ushtrime për forcimin e muskujve të paktën 2 ditë në javë.

Kjo mund të jetë veçanërisht e rëndësishme që nga të 40-at tona, mund të përfshijë ushtrime të tilla si përdorimi i peshave me duar, ose kryerja e push-ups ose siç i njohim me termin ‘pompa’, squats ose lunges, ose thjesht punë rreth shtëpisë që kërkojnë ngritjen e peshave.

Është e rëndësishme të mbani shënim edhe kohën e kaluar duke qëndruar ulur, pasi qëndrimi ulur për periudha të gjata është një faktor i pavarur rreziku për shëndetin, madje edhe në mesin e atyre që janë aktivë në periudha të tjera të kohës.

Bëjeni zgjedhjen tuaj dhe individualizoni programin tuaj. Ju pëlqen të stërviteni vetëm apo me të tjerët? A ju pëlqen muzika, uji, kërcimi apo konkurrenca? Doni të merrni përfitimet e jogës? Ndoshta programi juaj i ushtrimeve mund të jetë më shumë për heqjen e stresit nga një punë me presion të lartë? Sidoqoftë nuk ka dyshim se shëndeti juaj do të përfitojë nga fillimi i aktivitetit fizik, dhe pas një periudhe të shkurtër do të falënderoni veten për këtë.

*Tibo News