Ish presidenti amerikan George W Bush bëri një gafë kur dënoi aksidentalisht ‘pushtimin e pajustifikuar dhe brutal të Irakut nga Rusia’.

George W Bush, 75 vjeç i cili dërgoi forcat amerikane në Irak për të rrëzuar Sadam Huseinin gjatë presidencës së tij, bëri gabimin në një fjalim për demokracinë të mbajtur të mërkurën.

Ai tha: ‘Zgjedhjet ruse janë të manipuluara. Kundërshtarët politikë burgosen ose eliminohen ndryshe nga pjesëmarrja në procesin zgjedhor. Rezultati është mungesa e kontrolleve dhe balancave në Rusi. Vendimi i një njeriu për të nisur një pushtim tërësisht të pajustifikuar dhe brutal të Irakut… e kam fjalën për Ukrainën.’

Bush u përpoq të qeshte dhe fajësoi moshën për gabimin. Të pranishmit që po dëgjonin fjalimin e Bush qeshën gjithashtu.

Gjatë presidencës së Bushit, SHBA, Britani dhe aleatët e tyre pushtuan Irakun në vitin 2003 për të rrëzuar qeverinë e Sadam Huseinit, duke pretenduar se ai kishte armë bërthamore dhe kimike.

Lufta shkatërroi shoqërinë irakiane dhe krijoi më shumë konflikt dhe paqëndrueshmëri në të gjithë rajonin, ndërsa nuk u gjet asnjë provë që Huseini posedonte armë kimike.

Një studim nga Iraku Body Count vlerësoi se vdekjet e civilëve për shkak të pushtimit dhe dhunës që pasoi midis 2003 dhe 2013 ishin 122,438.

Lapsusi i Bush ka ngjallur kritika dhe tallje në internet.

Senatorja amerikane Nina Turner e quajti Bushin një “kriminel lufte” në Twitter në përgjigje të komentit të tij. Një tjetër kolumnist me emrin Wajahat Ali shkruante se “u deshën 20 vjet që George W Bush të rrëfehej më në fund”.

*Tibo News