AlbanianEnglish

Kur u krijua dhe si funksionon NATO?

Organizata e Atlantikut të Veriut, ose shkurt NATO, është një aleancë politike dhe ushtarake, e cila synon ruajtjen e paqes dhe sigurisë të 30 anëtarëve të saj.

NATO u formua në Uashington në vitin 1949 si reagim ndaj kërcënimeve sovjetikëve që vinin nga lindja e Europës. Fillimisht ishin 12 vende aleate. Por organizata u zgjerua me anëtarësimin e të tjera vendeve në periudha të ndryshme.

Zgjerimi i fundit ndodhi në vitin 2020 me futjen e Maqedonisë së Veriut.

Zyrat qendrore civile të NATO-s janë në Bruksel, atje mbikëqyren operacionet ndërkombëtare dhe koordinohet puna e nëntë qendrave të tjera në vende si Holanda, Turqia dhe Shtetet e Bashkuara.

Vitet e fundit të paktën 20 mijë ushtarë të NATO-s kanë qenë të angazhuar në misione paqeruajtëse në gjithë botën duke menaxhuar operacione ushtarake në Afganistan, Kosovë dhe mbarë Mesdheun.

Gjithashtu ka pasur bashkëpunim edhe me shtetet e Afrikës.

Prej vitit 2018 NATO ka nisur misione trajnimi në Irak ndërsa në bashkëpunim me Turqinë siguron misione dhe sisteme mbrojtjeje nga ajri dhe toka.

Në thelb të traktatit të NATO-s qëndron parimi i mbrojtjes së përbashkët. Sipas “Nenit 5” një sulm ndaj një prej shteteve anëtare konsiderohet si sulm ndaj gjithë shteteve anëtare.

Ky nen u zbatua për herë të parë në vitin 2001 si lëvizje solidarizuese e shteteve anëtare pas sulmeve terroriste të 11 shtatorit në SHBA.

*Përkthyer dhe përshtatur nga AFP.

You don't have permission to register