Zëvendësguvernatori i Khersonit me emrin Kirill Stremousov, i vendosur nga Rusia ka ndërruar jetë.

Lajmin e kanë bërë me dije mediat shtetërore ruse, ku thonë se Stremousov ndërroi jetë si pasojë e një aksidenti automobilistik.

Stremousov, 45 vjeç, u emërua në detyrën e tij dy muaj pas pushtimit rus të Ukrainës.

Ai ishte një nga ‘ithtarët’ më të shquar të pushtimit rus dhe u bë i njohur për deklaratat agresive në rrjetet sociale. Ai kërkohej për tradhti nga policia ukrainase.

Shumë zyrtarë të emëruar nga Rusia në Ukrainën e pushtuar janë shënjestruar në sulme.

Kherson, e vetmja qendër rajonale ukrainase e kapur nga trupat ruse pas pushtimit, është vënë në shënjestër nga një kundërofensivë ukrainase.

Ditët e fundit, Stremousov u kërkoi civilëve të largoheshin nga bregu lindor i lumit Dnipro përballë përparimit ukrainas, mes indikacioneve se forcat ruse mund të braktisin qytetin.

Ukraina akuzon Rusinë për dëbimin me forcë të banorëve vendas.

*Tibo News