Ju mund të keni dëgjuar për javën e punës katër ditore ku punonjësit punojnë vetëm katër nga pesë ditët tradicionale të punës, por me të njëjtën pagesë, me pritshmëri për të ruajtur nivelet e produktivitetit.

Një provë e suksesshme gjashtëmujore e këtij modeli pune përfundoi së fundmi në Mbretërinë e Bashkuar. Kompanitë vunë në dukje rritje të produktivitetit dhe më shumë interes nga punonjësit e mundshëm, ndërsa punëtorët thonë se kjo përmirësoi cilësinë e jetës së tyre.

Por shqetësimet rreth faktorëve si fitimi, presioni i shtuar për punëtorët për shkak të një ngarkese më të madhe ditore të punës dhe nevoja për të qenë në dispozicion të klientëve gjatë gjithë orarit standard të punës mbeten.

Sam Franklin, CEO i kompanisë së teknologjisë Otta, shton se shkurtimi i një dite të plotë dukej si një hap i madh pasi shkurton orët e punës me 20%.

Pra, a ka një rrugë të mesme? Ja përshembull dy javët nëntëditore.

Çfarë është “dy javë 9-ditore”?

Modeli i punës për dy javë nëntëditore do të thotë efektivisht se përgjatë 14 ditëve kalendarike, nëntë prej tyre janë ditë pune dhe pesë janë ditë pushimi. Çdo javë tjetër, punonjësit marrin një ditë shtesë pushimi, kryesisht të premten.

Disa kompani u kërkojnë punonjësve të punojnë më shumë orë në ditët që punojnë për të lejuar një ditë pushimi shtesë, të tjerë thonë se kjo nuk është e rëndësishme të thuhet për sa kohë që produkti i tyre mbetet i qëndrueshëm.

Otta është një nga kompanitë e shumta që aktualisht po provon këtë model pune, me mendimin se nëse shkon mirë, një kalim në javën katër-ditore mund të jetë përfundimisht një opsion.

Dy javët 9-ditore në praktikë

Shumë nga përfitimet janë të ngjashme me ato të javës katërditore, sipas atyre që e kanë testuar atë. Kjo përfshin produktivitetin, kënaqësinë e punonjësve, një ekuilibër më të mirë punë-jetë dhe mirëqenie të përmirësuar.

Ben Branson-Gateley, CEO dhe bashkëthemelues i firmës së softuerit të burimeve njerëzore Charlie HR, e cila gjithashtu provon praktikën me dy javë nëntëditore, thotë se ai ka vërejtur përfitime shtesë në krahasim me javën katërditore.

Punonjësit janë në gjendje të kalojnë midis stileve të punës dhe mund të përshtaten me mënyrën se si punojnë bazuar në sa ditë ka java e tyre e punës, si dhe duke shijuar përmirësimet e cilësisë së jetës, shpjegon Branson-Gateley.

Ende nuk është për të gjithë

Ashtu si java katërditore, dy javët nëntëditore nuk i përshtaten çdo biznesi dhe çdo punonjësi. Firma e marrëdhënieve me publikun Stand, me qendër në Londër, është një prej tyre, shpjegon themeluesja Laura Oliphant.

“Përfitimet ishin të dukshme, ndjeva se po mbështesnim më mirë mirëqenien mendore të punonjësve, duke reduktuar stresin dhe djegien, duke lënë kohë për të pushuar. Dhe ekipi u ndje më produktiv. Por kishte disa të meta,” shpjegon ajo.

Stand tani ndjek një model pune prej 4,5 ditësh – të premteve të gjithë firmosin në orën 13:00 dhe qëndron një person për ekip që ruan për email-et e rëndësishme.

Kjo ka adresuar problemet që firma gjeti me javën nëntëditore, por përfitimet kanë mbetur. Dhe mësimi më i madh i Oliphantit nga përvoja?

“Një gjë e rëndësishme për ne është të mos kufizohemi nga një model fleksibël që funksionon për dikë tjetër. Është e rëndësishme të gjesh atë që është e duhura për biznesin dhe klientët tuaj,” thotë ajo.

Burimi: CNBC Make it