Salman Rushdie ka dhënë intervistën e tij të parë që nga sulmi në Nju Jork vitin e kaluar.

Muaj pasi u godit me thikë në mënyrë të përsëritur ndërsa përgatitej të jepte një leksion në një ngjarje letrare në Nju Jork, autori fitues i shumë çmimeve, Salman Rushdie ka humbur shikimin në syrin e tij të djathtë. Pavarësisht kësaj, përpiqet të shkruajë, por nganjëherë, ka ankthe “të frikshme”.

Megjithatë, ai ende ka një ndjenjë mirënjohjeje, tha ai gjatë intervistës së tij të parë që nga sulmi.

“Epo, ju e dini, unë kam qenë më mirë, duke marrë parasysh atë që ndodhi, nuk jam aq keq,” i tha ai David Remnick të The New Yorker gjatë një interviste.

“Lëndimet e mëdha janë shëruar. Kam dhimbje në gishtin e madh, gishtin tregues dhe në gjysmën e poshtme të pëllëmbës. Unë jam duke bërë shumë terapi duarsh dhe më kanë thënë se po ia kaloj shumë mirë,” vazhdoi Rushdie me përshkrimin.

Rushdie tregoi se është njeri me fat dhe tha se ndjenja kryesore që ka aktualisht është mirënjohja.

Remnick, i cili foli me Rushdie personalisht në zyrën e agjentit të tij në Manhattan dhe përmes Zoom, shkroi se autori fitues i çmimit “Booker” kishte humbur më shumë se 18 kilogramë dhe kryesisht lexon përmes një iPad-i në mënyrë që të mund të rregullojë ndriçimin dhe madhësinë e shkronjave.

“Ai flet rrjedhshëm si gjithmonë, por buza e poshtme i bie nga njëra anë. Nervi ulnar në dorën e tij të majtë ishte dëmtuar shumë,” përmbylli ai.