Hakerat po synojnë të sulmojnë grupet evropiane të bamirësisë që ndihmojnë refugjatët ukrainas të ikin nga vendi pas pushtimit të Rusisë.

Alarmi u ngrit nga një zyrtar i lartë ukrainas i sigurisë kibernetike.

Victor Zhora, zëvendës-shefi i Shërbimit Shtetëror të Mbrojtjes së Informacionit të Ukrainës nuk dha shumë detaje të mëtejshme.

Komentet e tij pasojnë një raport të botuar në fillim të këtij muaji. Raporti pretendonte se hakera të paidentifikuar po pengonin personelin e qeverisë evropiane të përfshirë në menaxhimin e fluksit masiv të refugjatëve jashtë vendit.

“Ne supozojmë se kjo është një tjetër provë e përhapjes së luftës kibernetike në vendet e NATO-s,” tha zyrtari ukrainas.

Më shumë se 3.5 milionë njerëz janë larguar nga Ukraina që kur Rusia nisi pushtimin më 24 shkurt.

Agjencia e refugjatëve të Kombeve të Bashkuara e ka cilësuar si krizën më të shpejtë të refugjatëve në Evropë që nga fundi i Luftës së Dytë Botërore.