Djali vret nënën e tij në Rrogozhinë, e njoftoi si vdekje natyrale

Një ngjarje e rëndë raportohet të ketë ndodhur në fshatin Vilë Bashtovë i Rrogozhinës ku një nënë 75 vjeçare është dhunuar për vdekje nga djali i saj 35 vjeç. Sipas policisë dyshohet se 35 vjeçari vuan nga probleme të shëndetit mendor, ndërkohë që në polici ka raportuar se nëna e tij ndërroi jetë për shkaqe natyrale. Por pas hetimeve dhe ekspertizës mjeko-ligjore, rezultoi se nëna ishte abuzuar fizikisht nga i biri deri në humbjen e jetës.

Njoftimi i plotë i policisë:

U raportua fillimisht si vdekje natyrale, si rezultat i veprimeve të thelluara hetimore, zbardhet shkaku i humbjes së jetës së 75-vjeçares. Vrau nënën e tij, nëpërmjet dhunës fizike, arrestohet në flagrancë 35-vjeçari. 35-vjeçari vuante nga sëmundje mendore. Në vijim të veprimeve të thelluara hetimore të kryera në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, për zbardhjen e shkakut të humbjes së jetës së shtetases I. S., 75 vjeçe, e cila u gjet e pajetë më datë 10.02.2024, në banesën ku jetonte me djalin e saj, sqarojmë se:

Në momentet e para, nga këqyrja e jashtme paraprake e trupit të 75-vjeçares, nuk janë konstatuar shenja dhune dhe ngjarja është raportuar si vdekje natyrale. Pas kryerjes së hetimeve të thelluara dhe ekspertizës mjeko-ligjore, është konstatuar se shtetasja I. S. kishte disa orë që kishte humbur jetën.

Gjithashtu, rezultoi se djali i saj, shtetasi N. S., i cili vuan nga sëmundje mendore, kishte ushtruar dhunë fizike ndaj 75-vjeçares, dhunë e cila i kishte shkaktuar dëmtime që kishin sjellë si pasojë humbjen e jetës. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.