Walt Disney Co ka hequr një episod nga seriali vizatimor “The Simpsons” që përfshinte një referencë për “kampet e punës së detyruar” në Kinë nga shërbimi i saj i transmetimit në Hong Kong.

Kompania nuk iu përgjigj menjëherë një kërkese për koment se pse episodi, “One Angry Lisa” nga sezoni i 34-të i Simpsons, nuk ishte i disponueshëm për t’u transmetuar në shërbimin e transmetimit “Disney Plus” në territorin gjysmë autonom kinez.

Episodi u transmetua për herë të parë në televizion në tetor dhe nuk ishte e qartë se kur episodi u hoq nga shërbimi i transmetimit të Hong Kongut.

Në episod, personazhi i Simpsons, Marge Simpson, merr një klasë virtuale, instruktori i të cilit ndodhet përballë një sfondi virtual të Murit të Madh të Kinës dhe thotë: “Shikoni mrekullitë e Kinës. Minierat e Bitcoin, kampet e punës së detyruar ku fëmijët prodhojnë smartfonë.”

Çështja e punës së detyruar është e ndjeshme në Kinë. Pekini i sunduar nga komunistët ka vendosur gjithnjë e më shumë kontrollet e tij mbi Hong Kongun, një ish-koloni britanike, pasi mori kontrollin e territorit në 1997.

Qeveritë dhe aktivistët perëndimor kanë akuzuar për vite me radhë Kinën për burgosjen e qindra mijëra pakicave etnike, kryesisht ujgure, në rajonin perëndimor të Xinjiang në kampet e paraburgimit. Kina ka hedhur poshtë akuzat se përdor punë të detyruar në ato kampe.

Kina thotë se kampet janë qendra arsimore të krijuara për të mësuar gjuhën kineze dhe aftësitë profesionale.

Ata premtuan se Hong Kongu do të ruante liritë e stilit perëndimor për 50 vite pas dorëzimit nga sundimi britanik. Megjithatë Pekini ka forcuar kontrollet pas imponimit të një Ligji për Sigurinë Kombëtare pas protestave masive pro-demokracisë në vitin 2019, duke ngritur shqetësime për një dobësim të lirive civile si liria e fjalës dhe shtypit.

Në vitin 2021, Hong Kongu zbatoi një ligj për censurën e filmit që do t’i lejonte autoritetet të ndalonin filmat që konsideroheshin në kundërshtim me interesat e sigurisë kombëtare. Në atë kohë, zyrtarët thanë se rregullimi i filmave të shfaqur në internet do të ishte jashtë fushëveprimit të projektligjit.

Censura e serialeve ose filmave televizivë perëndimor është e zakonshme në Kinën kontinentale, me censurues që fshijnë skenat ose ndalojnë përmbajtjen që shihen si në kundërshtim me vlerat që konsiderohen të përshtatshme nga Partia Komuniste Kineze.

The Simpsons është shfaqur herë pas here në Kinë. Sipas kontrolleve nga AP, klipet e Simpsonëve mund të gjenden ende në faqet e videove kineze, por jo skena nga “One Angry Lisa”.

*TiboNews