Njerëzit nuk mund të marrin të gjithë vlerat ushqyese me dietën e tyre, kjo jo vetëm falë regjimit ushqimor, por edhe stilit të jetesës në përgjithësi. Prandaj, shpesh u drejtohemi suplementeve, për të përmbushur këto “boshllëqe” vlerash ushqyese.

Ekzistojnë 13 vitamina thelbësore për trupin, të cilat klasifikohen: të tretshme në ujë (vitamina C dhe vitaminat e kompleksit B) dhe të tretshme në yndyrë (vitamina A, D, E dhe K).

Kur trupit i mungojnë vitaminat esenciale pra ato bazë, ne mund të hasim probleme të ndryshme shëndetësore. Ja disa nga pasojat më të zakonshme të mungesës së vitaminave:

Mungesa e vitaminës C dhe vitaminës D sjell funksionim të dobët të sistemit imunitar. Mungesa e këtyre vitaminave mund ta dobësojë atë, duke e bërë atë më të ndjeshëm ndaj infeksioneve dhe sëmundjeve.

Hekuri dhe vitamina B12 janë thelbësore për formimin e qelizave të kuqe të gjakut, mungesa e tyre mund të shkaktojë anemi. Në këtë rast trupi nuk ka mjaftueshëm qeliza të kuqe të gjakut për të transportuar oksigjen në inde.

Vitamina D dhe kalciumi janë thelbësore për zhvillimin dhe mirëmbajtjen e kockave të forta. Mungesa e tyre mund të çojë në osteoporozë, një gjendje në të cilën kockat bëhen të dobëta dhe të brishta.

Probleme me shikimin? Vitamina A është thelbësore për shikim të mirë.

Mungesa e vitaminës E na sjell probleme të lëkurës. Prandaj ajo është e rëndësishme për të patur një lëkurë të shëndetshme dhe plot shkëlqim.

Dëmtimi i nervave: Vitamina B12 dhe vitaminat e tjera të kompleksit B janë thelbësore për funksionimin e duhur të sistemit nervor. Mungesa e këtyre vitaminave mund të shkaktojë dëmtim nervor, duke çuar në mpirje, ndjesi shpimi gjilpërash dhe simptoma të tjera.

Vitamina C është thelbësore për formimin e kolagjenit, një proteinë që është e rëndësishme për shërimin e plagëve. Mungesa e saj do të na sillte shërim të vonuar të plagëve.

Dobësia e muskujve: Kaliumi dhe magnezi janë thelbësorë për funksionimin e duhur të muskujve.

Vitaminat B1, B2, B3 dhe B6 janë të rëndësishme për prodhimin e energjisë në trup. Mungesa e këtyre vitaminave mund të shkaktojë lodhje apo dobësi.