Këngëtarja Camila Cabello nga Havana do të dalë në skenën në Birmingham, Angli më 29 mars për të ndihmuar në mbledhjen e fondeve për ata që janë prekur nga pushtimi i forcave ruse në Ukrainë.

“Zemra ime po thyhet për popullin e Ukrainës”, tha ajo në një deklaratë. “Ndërsa refugjatët nga Ukraina i bashkohen miliona njerëzve të tjerë të zhvendosur anembanë globit, ne të gjithë kemi një përgjegjësi. Një nga nevojat më të mëdha është të marrim fonde për organizatat që mund t’u shërbejnë drejtpërdrejt këtyre komuniteteve, kështu që ne po përqendrojmë përpjekjet tona për ta bërë këtë sa më shpejt që të mundemi.”

Në skenë do të performojnë edhe Emeli Sandé, Gregory Porter dhe Snow Patrol. Artistë të tjerë pritet të konfirmohen në ditët në vijim.

Shfaqja dy-orëshe “Concert For Ukraine” do të zhvillohet në Resorts World Arena në Birmingham dhe do të transmetohet në ITV. Televizioni do të kombinojë shfaqjen muzikore me filma të shkurtër rreth konfliktit të vazhdueshëm dhe përpjekjeve për ndihmë.

Shikuesit do të jenë në gjendje të dhurojnë për Apelin Humanitar të Ukrainës të Komitetit të Emergjencave dhe Fatkeqësive (DEC), i cili ofron ushqim, ujë, strehim dhe ndihmë mjekësore për njerëzit e zhvendosur në Ukrainë dhe vendet fqinje, gjatë shfaqjes.

Zyrtarët e ITV kanë njoftuar gjithashtu se të gjitha të ardhurat nga sponsorizimi dhe fitimet e gjeneruara nga transmetimi do të shkojnë në ndihmë të dëmtuarve nga lufta në Ukrainë.