Ndryshimet klimatike po shihen çdo ditë e më shumë dhe njerëzimi është larg nga të qenit gati për këtë. Ky ishte paralajmërimi nga raporti i panelit të klimës  së OKB-së të hënën, ndërsa bën thirrje për veprime të menjëhershme.

I dërguari i SHBA-së për Klimën, John Kerry, u ankua se është bërë shumë pak për t’iu përshtatur ndryshimeve klimatike dhe tha se raporti ofron një “projekt veprimi”.

Paneli Ndërqeveritar për Ndryshimet Klimatike në OKB tha se gati gjysma e popullsisë së botës është tashmë e ndjeshme ndaj ndikimeve gjithnjë e më të rrezikshme klimatike dhe të paktën një e treta e planetit duhet të mbrohet për të siguruar furnizime të ardhshme me ushqim dhe ujë të pijshëm, duke shtuar se qytetet bregdetare kanë nevojë për plane për t’i mbajtur njerëzit të sigurt nga stuhitë dhe nivelet e detit në rritje.

Por në disa raste, pranon raporti, kostot e parandalimit do të jenë shumë të larta.

Frenimi i emetimeve të gazrave të dëmshëm dhe përshtatja me një botë më të ngrohtë do të kërkojë shumë para, të shpenzuara për financimin e teknologjive të reja dhe mbështetjen institucionale.

Sekretari i Përgjithshëm i OKB-së, Antonio Guterres, tha se përshtatja në këtë kohë shpëton jetë. Ndërsa ndikimet klimatike janë të dukshme dhe do të përkeqësohen, rritja e investimeve do të jetë thelbësore për mbijetesën.

Publikimi i raportit vjen tre muaj pasi udhëheqësit globalë theksuan urgjencën e përpjekjeve për të frenuar ngrohjen globale brenda -16.3°C nga temperaturat para-industriale.

Ky paralajmërim i fundit thotë se kufizimi i ngrohjes globale në afërsisht -16.3°C nuk mund të parandalojë humbjet për natyrën, shoqëritë ose ekonomitë, por do t’i zvogëlojë ato në mënyrë të konsiderueshme.