Popullsia shqiptare po regjistron një rënie të lindjeve vit pas viti.

Të dhënat më të fundit të INSTAT flasin për një rënie me gati 11% të lindjeve në këtë 9-mujor, në krahasim me periudhën Janar – Shtator të vitit 2022.

Për sociologët, përveç emigracionit, po ashtu edhe tendencat globale të individit drejt individualizmit po e thellojnë më tej këtë fenomen. “Janë zgjatur vitet e edukimit, është shtyrë mosha e krijimit të familjes. Element i dytë i referohet individualizmi”, thotë sociologia Eris Dhamo.

Sipas INSTAT,në tremujorin e tretë të këtij viti, vetëm Tirana ka shënuar rritje të numrit të lindjeve, ndërsa njëmbëdhjetë qarqet e tjera kanë pasur ulje, kjo në krahasim me tremujorin e tretë 2022. Parashikimet flasin për një ulje të metëjshme të lindjeve në këto zona. “Sidomos në zonat dhe qarqet e izoluara dhe të varfra sigurisht që do e kemi, zonat rurale sot janë boshatisur”.

Sociologët sugjerojnë shtim të politikave sociale për familjet e reja.

“Janë që nga paketat higjieno-sanitare për foshnjat, kuponat ushqimorë për të shkuar më tej tek transfertat cash”. Shtesa natyrore e popullsisë për 9-mujorin e vitit 2023 regjistron 1138 lindje më shumë se sa vdekje.