AlbanianEnglish

Ata që sot janë kundër zhvillimit, dje zaptuan çdo hapësirë publike, thotë Veliaj

“Vlera e pronës në kryeqytet është rritur tre herë”, kështu theksoi të martën Kryetari i Bashkisë Tiranë, Erion Veliaj, gjatë një takimi me qytetarët, teksa mbrojti politikën e ndjekur prej tij të rritjes së mëtejshme të zonave urbane të qytetit.

Nga Njësia 5, ku zhvilloi një bashkëbisedim me të rinjtë e zonës, Veliaj tha se ata që sot janë kundër të ardhurve në Tiranë, kundër zhvillimit të qytetit dhe kundër ndërtimeve, janë po ata që lejuan zaptimin e hapësirave publike dhe ndërtimet pa leje kudo. 

“Tani që ka afruar fushata, fillojnë këto muhabetet ‘kush është i ardhur, kush është vendali’. Janë muhabete pa lidhje në një qytet ku 90% e njerëzve kanë ardhur nga diku tjetër. Dhe këta që i mëshojnë kësaj, janë po ata që në vitet ’90, kur drejtonin Tiranën, lejuan në mënyrë fyese ndërtime pa kriter kudo. Hapësirat që ziheshin nuk ishin hapësirat ku dikush i kishte dalë zot, ziheshin hapësirat e përbashkëta. Pra, një sheshpushim brenda pallatit, një hapësirë e Bashkisë apo një hapësirë publike”, kujtoi Veliaj. 

“Kur erdhëm në administratën e Bashkisë së Tiranës, ishte e gjitha e pushtuar me kioska, nga këta që thonë: ‘betoni, betoni, betoni’. Është tjetër gjë të ndërtohet hotel “Marriott” – dhe unë jam shumë krenar për atë lloj betony sepse s’mund të jemi Kryeqyteti i Rinisë dhe Qyteti i Sportit, pa pasur hotele me 5 yje, siç na u desh për Samitin e BE-së. Pra, ne duam të jemi edhe më të mirët, por mos të kemi fare infrastrukturë! Njerëzit nuk flenë nëpër lulishte! Në qoftë se duam turistë, na duhen këto hotele dhe hapësira që akomodojnë qindra e mijëra turistë. Por, ajo që më vjen keq është se s’ka pikë reflektimi nga këta që kanë administruar bashkinë në ato vite dhe shkollat i zaptuan ose me kioska, ose i bënë gati për pallate”, nënvizoi Veliaj.

Veliaj nënvizoi se prona në Tiranë është rritur deri në tre herë më shumë krahasuar me periudhën më përpara. Ai e konsideroi këtë si një vlerë të shtuar për të gjithë qytetarët, pa dallime politike.

“Është e pashmangshme që do ketë pallate edhe për ata që marrin kredi të butë, do ketë pallate edhe për të pasurit, edhe për të huajt që duan të jetojnë në Tiranë. Dikush reklamonte se në zonën e hyrjes së Liqenit, nga Filologjiku, shitej apartament në pallat me 3 mijë euro m2. Nga njëra anë, ky është lajm i mirë sepse prona është rritur për të gjithë, si për të majtët, si për të djathtët – është rritur rreth 2.5-3 herë më shumë në Tiranë, se të gjithë janë pasuruar, edhe ata që i shajnë ndërtimet – por, pyetja është: A e kemi luksin që, pas orës 13:00, shkolla “Petro Nini” ose “Samiu” ta mbyllin palestrën, në një vend ku prona vlen kaq shumë? Ajo që kemi bërë është që çdo palestër e kemi lidhur me një shoqatë volejbolli ose basketbolli, ku stërbiten fëmijët pas mësimit”, theksoi Veliaj. 

Më tej Kryetari i Bashkisë apeloi edhe për çdo kundërshtar që të reflektojë dhe të mos bllokojë qytetin për inate politike. 

“Përveçse u uroj sukses të gjithë atyre që do të kandidojnë për Bashkinë e Tiranës, u kërkoj të edhe të reflektojnë, se për inat të parties ose për inat të tjetrit, nuk duhet t’i bllokojmë punët e qytetit. Fatkeqësisht kjo ka ndodhur, janë bllokuar shumë punë vetëm për çështje politike. Kujtoj, për shembull, se sa është vonuar sheshi “Skënderbej”, sa është vonuar Pazari i Ri, sa është vonuar Kalaja, sa u vonuam te Astiri. Dikush mund të thote, ç’rëndësi ka, sepse rëndësi ka që u bë. Dakord, por humbëm tre vjet kohë. Në qoftë se një njeri jeton 100 vjet, 3 vjet janë 3% e jetës, por 3% këtu, 2% atje, 5% atje, po të ikën jeta vetëm duke penguar njëri-tjetrin. Ndaj, unë besoj se pavarësisht bindjeve që keni, ju duhet të keni një pakt mes jush, që si minimum të mos pengoni njëri-tjetrin kur dikush punon. Të mos i vini stërkëmbësha njëri-tjetrit kur dikush vrapon,” u tha Veliaj të rinjve të Njësisë 5.

You don't have permission to register