AlbanianEnglish

Artisti ukrainas, “i urdhëruar” për të shëruar luftën me art

Detyra kryesore e artit është të shërojë dhe në Kiev, shkatërrimin po e kurojnë me një artist që mbush muret e luftës me ngjyra.

I veshur me një jelek të zi antiplumb që mban shenjat e ushtrisë ukrainase, artisti Hamlet Zinkovsky ka pikturuar rrugët e shkatërruara nga lufta të Kharkiv, që njëkohësisht është edhe vendlindja e 35-vjeçarit.

I njohur ndërkombëtarisht për veprat e tij të artit bardhë e zi, të cilat janë ekspozuar në mbarë botën, Hamleti ka lënë mënjanë suksesin e tij të mbarëbotëror dhe tani po përdor talentin e tij për mbështetje në luftën e Ukrainës.

“Nëse lëviz, mund të kem karrierën time diku jashtë. Por do të jetë vetëm rehati. Në Ukrainë, kam ndjenjën se po ndërtoj vendin. Qyteti është galeria ime,” tha ai.

Sipas Hamletit, komandanti i një batalioni ushtarak lokal e urdhëroi atë të gjallëronte rrugët e Kharkivit me artin e tij.

“Më ftuan në një batalion … Komandanti im më dha urdhër, bojë!” tregoi ai.

Hamleti nënshkruan secilën nga veprat e tij të artit, duke shkruar “Hamlet 22, Batalion Hartiya”.

Artisti ka pikturuar veprat e tij të artit në dërrasa druri që mbulojnë dritaret dhe pamjet e jashtme të ndërtesave të dëmtuara në Kharkiv.

Ai shpreson se veprat e tij një ditë do t’i jepen një muzeu të ardhshëm të luftës ose do të shiten për të mbledhur para për përpjekjet luftarake të Ukrainës kundër Rusisë.

Zinkovsky beson se arti i tij i rrugës mund të ndihmojë në ngritjen e moralit publik dhe të frymëzojë popullin ukrainas për të “luftuar dhe mbrojtur” vendin e tyre.

“Unë shoh njerëz të buzëqeshur dhe të lumtur, sepse ata më shohin duke pikturuar një ndërtesë të shkatërruar që ata e donin” -shtoi  ai.

 

*Tibo News

 

 

You don't have permission to register