Një ekip arkeologësh jordanezë dhe francezë thanë se kishin gjetur një tempull afërsisht 9,000-vjeçar në një vend të largët neolitik në shkretëtirën lindore të Jordanisë.

Kompleksi ritual u gjet në një kamping neolitik pranë strukturave të mëdha të njohura si “desert kites”, ose kurthe masive që besohet se janë përdorur për të kapur gazelat e egra për therje.

“Vendi është unik, së pari për shkak të gjendjes së tij të mirë,” tha arkeologu jordanez Wael Abu-Azziza, bashkëdrejtor i projektit. Është 9,000 vjet i vjetër dhe gjithçka ishte pothuajse e paprekur.”

Brenda tempullit ishin dy gurë të gdhendur në këmbë që mbanin figura antropomorfe, një altar, vatër, guaska deti dhe modele në miniaturë të kurthit të gazelës.

Studiuesit thanë në një deklaratë se tempulli hedh një dritë krejtësisht të re mbi simbolikën, shprehjen artistike si dhe kulturën shpirtërore të këtyre popullsive neolitike të panjohura deri tani.

Afërsia e zonës me kurthe sugjeron se banorët ishin gjuetarë të specializuar dhe se kurthet ishin qendra e jetës së tyre kulturore, ekonomike dhe madje simbolike në këtë zonë margjinale.

Ekipi përfshinte arkeologë nga Universiteti “Al Hussein Bin Talal” i Jordanisë dhe Instituti Francez i Lindjes së Afërt. Vendi u gërmua gjatë sezonit më të fundit të gërmimit në 2021.