A po na zëvëndëson AI? Aktori argjentinas humbet vendin e punës

Kohëve të fundit teknologjia po arrin në majat më të larta dhe duket se rrezikun po e ndjejnë kryesisht profesionistët krijues.

Shumë punë duket sikur po mund të kryehen më së miri me zhvillimin e teknologjisë.

Viti filloi i qetë për Alejandro Graue. Aktori argjentinas i zërit dhe i dublimit mezi priste të punonte në disa projekte. Në njërën, ai u punësua për të dubluar në spanjisht për një kanal në YouTube me miliona abonentë.

Graue kishte punuar në këtë projekt që në nëntor dhe kishte refuzuar punë të tjera pasi kjo kërkonte shumë përpjekje. Por, pas një pushimi të shkurtër, ai zbuloi diçka tronditëse. Ndërsa shikonte YouTube, ai pa që kanali kishte ngarkuar një video të re në spanjisht. Graue tha për Euroneës:

“Mendova se ishte e çuditshme sepse nuk më kishin telefonuar ende për ta regjistruar.”

Kur shtypi play dhe dëgjoi regjistrimin, ai u trondit. Zëri ishte krijuar nga inteligjenca artificiale. Aktori shtoi:

“Ishte një zë i automatizuar, nuk kishte asnjë pasuri, asnjë nuancë, pa ritëm. Shqiptimi ishte krejtësisht mekanik.”

Në vetëm pak muaj, AI ka tronditur tregun e punës, me mijëra profesionistë të trembur që duan që teknologjia të frenohet ose të rregullohet. Aktori 36-vjeçar argjentinas është një prej tyre, pasi ka frikë se do t’i japë fund karrierës së tij. Alejandro thotë:

“Dëgjimi i atij zëri artificial në video pati një ndikim të madh tek unë. Kam frikë për të ardhmen time. Dublimi ka qenë puna ime për 18 vitet e fundit dhe tani kam dy vajza të vogla.”

Ai i dërgoi email kompanisë pasi pa videon dhe ata konfirmuan se nuk kishin nevojë që ai të dublonte zërin. Brenda disa javësh nga ngarkimi i videove të krijuara nga AI, përdoruesit e YouTube filluan të ankohen. Ata e cilësuan zërin “të tmerrshëm” dhe e ndjenë se ishte e vështirë për t’u kuptuar. Graue tha për Euroneës:

“Kjo sigurisht ka pasur një ndikim sepse kanali fshiu videot e fundit të bëra me zë artificial, por deri më tani nuk jam kontaktuar ende për të punuar përsëri këtë punë.”

 Aktori beson se softueri i përdorur duhej të ishte falas ose me kosto të ulët pasi “cilësia e zërit ishte shumë e keqe”. Vërejtjet e tij hapin një aspekt tjetër të debatit: nëse kompanitë që kursejnë kosto mund të shkëmbejnë fuqinë punëtore me inteligjencën artificiale, pa sakrifikuar diçka tjetër.