Gjigandi i avionëve Boeing do t’i përgjigjet një akuze mashtrimi në gjykatë për dy përplasjet e avionit që vranë 346 njerëz.

Të dy aksidentet ndodhën për shkak të defekteve në sistemet e kontrollit të fluturimit në avionin 737 Max.

Boeing u zbulua se kishte dështuar në zbulimin e informacionit në lidhje me sistemin, por shmangu një gjykim duke rënë dakord të paguante 2.5 miliardë dollarë gjobë dhe kompensim.

Familjarët e atyre që ndërruan jetë po përpiqen të rihapin çështjen.

Kjo do të thotë që për herë të parë, kompania do të akuzohet zyrtarisht në gjykatë në lidhje me dy aksidentet dhe do të duhet të pranojë fajësinë ose jo.

Boeing ka kundërshtuar më parë rihapjen e marrëveshjes me Departamentin e Drejtësisë së SHBA-ve duke thënë se një gjë e tillë do të ishte “e paprecedentë, e pazbatueshme dhe e pabarabartë”. Ajo nuk pranoi të komentojë mbi akuzën.

Avionët Boeing 737 Max u lejuan të fluturonin përsëri në SHBA në vitin 2020 dhe në Britani dhe BE në vitin 2021 pasi u ndaluan pas përplasjeve në 2019.

Kanë kaluar gati katër vjet që kur avioni ET302 i Ethiopian Airlines u rrëzua disa minuta pas nisjes nga Addis Abeba në Nairobi. 157 njerëz vdiqën teksa ra në tokë bujqësore jashtë kryeqytetit të Etiopisë në mars 2019.

Aksidenti ndodhi me avionin e dizajnit të ri -737 Max.

Disa muaj më parë, një avion pothuajse identik nga transportuesi indonezian Lion Air u rrëzua në detin Java në atë që duhej të ishte një fluturim rutinë nga Xhakarta në Pangkal Pinang. 189 pasagjerë dhe ekuipazhi humbën jetën.

Më vonë doli se të dy aksidentet u shkaktuan nga problemet e dizajnit, në veçanti përdorimi i softwerit të kontrollit të fluturimit të njohur si MCAS.

Sistemi u krijua për të ndihmuar pilotët me gjeneratat e mëparshme të 737 dhe për t’i parandaluar ata që të kenë nevojë për trajnim shtesë të kushtueshëm për të fluturuar me modelin e ri.

Por dështimet e sensorit shkaktuan keqfunksionimin e tij-dhe në të dyja rastet e detyruan avionin në një ulje katastrofike që pilotët nuk ishin në gjendje ta parandalonin.

Hetimet në SHBA zbuluan se Boeing nuk kishte përfshirë informacione në lidhje me sistemin MCAS në manualet e pilotëve ose udhëzimet e trajnimit dhe kishte kërkuar qëllimisht të minimizonte ndikimin e sistemit në komunikimet e tij me rregullatorin amerikan, Administratën Federale të Aviacionit.

*Tibo News